_1692346234_1692579957_1696057934.jpg)
धरान, २९ असोज। धरानस्थित धरान मन्टेस्वरी बोर्डिङ स्कुलले बडादसैँको अवसरमा कक्षा १ का विद्यार्थीलाई टीका र जमरा लगाइदिँदै दक्षिणासहित दसैँको शुभकामना तथा आशीर्वाद प्रदान गरेको छ।
दसैँको पाँचौँ दिन बिहीबार विद्यालयकी प्रिन्सिपल मैया राई अग्रवालसहित शिक्षिकाहरूले विद्यार्थीलाई टीका र जमरा लगाइदिएका हुन्। सो अवसरमा विद्यार्थीहरूको सुख, शान्ति, समृद्धि र सफलताको कामना गर्दै दसैँको शुभकामना व्यक्त गरिएको थियो।
नेपाली मौलिक संस्कार, संस्कृति, रीतिरिवाज तथा परम्पराको संरक्षण गर्दै नयाँ पुस्तामा हस्तान्तरण गर्ने उद्देश्यले कार्यक्रम आयोजना गरिएको विद्यालयकी प्रिन्सिपल मैया राई अग्रवालले बताउनुभयो।
धरान मन्टेस्वरीका प्रबन्ध निर्देशक दीपक अग्रवालले नेपालमा मनाइने विभिन्न चाडपर्वका अवसरमा विद्यार्थीलाई व्यवहारिक रूपमा सहभागी गराउँदै आएको बताउनुभयो। उहाँका अनुसार चाडपर्वसँग सम्बन्धित गतिविधिमा विद्यार्थीलाई प्रत्यक्ष सहभागी गराउँदा उनीहरूले नेपाली संस्कार, संस्कृति र परम्पराको महत्त्व नजिकबाट बुझ्ने अवसर पाउँछन्। यस्ता अभ्यासले नयाँ पुस्तामा सांस्कृतिक ज्ञान हस्तान्तरण गर्न र मौलिक परम्पराको संरक्षणमा सहयोग पुर्याउने उहाँको भनाइ छ।
दसैँलगायत नेपाली समाजमा मनाइने विभिन्न चाडपर्वले पारिवारिक सद्भाव, आपसी सम्मान र सामाजिक एकता अभिवृद्धि गर्न महत्त्वपूर्ण भूमिका खेल्छन्। विद्यालयमा यस्ता सांस्कृतिक गतिविधि सञ्चालन गर्दा विद्यार्थीले पाठ्यपुस्तकको ज्ञानसँगै व्यवहारिक अनुभवबाट पनि आफ्नो संस्कृति र पहिचानबारे सिक्ने अवसर पाउँछन्।
धरान मन्टेस्वरीले चाडपर्वका अवसरमा विद्यार्थीलाई प्रत्यक्ष सहभागी गराउँदै शिक्षा र संस्कारलाई सँगसँगै अघि बढाउने अभ्यास गर्दै आएको छ। यस्ता कार्यक्रमले बालबालिकामा सांस्कृतिक चेतना, आत्मीयता र सद्भाव विकास गर्नुका साथै नेपाली मौलिक परम्परालाई नयाँ पुस्तासम्म पुर्याउन सहयोग पुग्ने विश्वास गरिएको छ।
