_1692346234_1692579957_1696057934.jpg)
इटहरी | इटहरी उपमहानगरपालिकाले सामुदायिक विद्यालयहरूको भौतिक संरचना सुधार र शैक्षिक वातावरण उकास्न ऐतिहासिक कदम चालेको छ। शिक्षा सुधार कार्यक्रम अन्तर्गत उपमहानगरले ३६ वटा सामुदायिक विद्यालयमा ३,८६० थान अत्याधुनिक डेक्स बेन्च वितरण गरेको हो।
इटहरीको राष्ट्रिय माविमा आयोजित एक विशेष कार्यक्रममार्फत विद्यालयका प्रधानाध्यापकहरूलाई डेक्स बेन्च हस्तान्तरण गरियो। कार्यक्रममा मेयर हेमकर्ण पौडेलले पुराना र थोत्रा डेक्स बेन्चका कारण विद्यार्थीले भोग्नुपरेका समस्याहरू समाधान गर्नका लागि यो पहल गरिएको बताउनुभयो। उहाँका अनुसार आधुनिक डेक्स बेन्चहरूले विद्यार्थीहरूको पठन–पाठनलाई सहज बनाउनुका साथै विद्यालयप्रति विद्यार्थी र अभिभावकको आकर्षण बढाउने विश्वास गरिएको छ।
विद्यालयका प्रअ सरणकुमार बस्नेतले नयाँ डेक्स बेन्चले विद्यार्थीहरूको शैक्षिक वातावरणमा सकारात्मक परिवर्तन ल्याउने उल्लेख गर्नुभयो। उहाँले पुराना डेक्स बेन्चले विद्यार्थीलाई चोटपटक लाग्ने र लुगा च्यातिने समस्या समाधान भएकोमा खुशी व्यक्त गर्नुभयो।
उपमहानगरपालिकाले वितरण गरेका डेक्स बेन्चहरू बलियो संरचना र आकर्षक डिजाइनका छन्। ती बेन्चमा पुस्तक र शैक्षिक सामग्री राख्न मिल्ने सुविधा पनि छ, जसले विद्यार्थीहरूको दैनिक अध्ययनलाई थप सहज बनाउने विश्वास गरिएको छ।
डेक्स बेन्च वितरणसँगै उपमहानगरले सामुदायिक विद्यालय सुधारका अन्य कदमहरू पनि अघि बढाइरहेको छ। केही दिनअघि मात्र उपमहानगरले सबै सामुदायिक विद्यालयमा विद्यालय नर्सको व्यवस्था गरेको थियो। यो पहलले विद्यार्थीहरूको स्वास्थ्य र हेरचाहमा महत्वपूर्ण भूमिका खेलेको छ।
कार्यक्रममा वडा अध्यक्ष रतन कार्की, इटहरी उपमहानगरपालिकाका शिक्षा शाखाका पदाधिकारीहरू, विद्यालय व्यवस्थापन समितिका प्रतिनिधिहरू, र सामुदायिक विद्यालयका प्रधानाध्यापकहरूको सहभागिता थियो।
इटहरी उपमहानगरको यो पहलले सामुदायिक विद्यालयहरूको भौतिक तथा शैक्षिक गुणस्तर सुधार गर्ने, विद्यार्थीहरूको संख्या बढाउने र शिक्षा क्षेत्रलाई थप प्रभावकारी बनाउने विश्वास गरिएको छ। विद्यार्थी, अभिभावक, र शिक्षकहरूले यस कार्यको प्रशंसा गर्दै उपमहानगरको प्रयासलाई स्वागत गरेका छन्।
