इटहरी | इटहरी २० मा रहेको शान्ति जनकल्याण बहुउद्देशीय सहकारी संस्था लिमिटेडको अध्यक्ष पदका लागि शनिबार सम्पन्न उपनिर्वाचनमा चन्द्रकुमार गिरी विजयी भएका छन्।

गिरीले कुल १,०७५ मत प्राप्त गर्दै विजय हासिल गरेका हुन्। उनका निकटतम प्रतिस्पर्धी वसन्त कुमार श्रेष्ठले ५१४ मत ल्याएका थिए। गिरी र श्रेष्ठबीचको मतान्तर ५६१ रह्यो। उपनिर्वाचनमा कुल १,६३१ मत खसेकोमा ४२ मत बदर भएको थियो।

२०७९ पुस २९ मा सम्पन्न सहकारीको नियमित निर्वाचनबाट इटहरी-२ शान्तिनगर निवासी वीरबहादुर लिम्बू अध्यक्षमा निर्वाचित भएका थिए। तर, २०७९ चैत २८ गते लिम्बूको असामयिक निधन भएपछि अध्यक्ष पद खाली भएको थियो। सहकारीका कार्यवाहक अध्यक्ष चिन्तामणि सापकोटाका अनुसार, अध्यक्षको अभावले सहकारीको दैनिक कार्यसम्पादनमा केही चुनौती थपिए पनि उपनिर्वाचनमार्फत नयाँ नेतृत्व चयन भएपछि सहकारीलाई अझ प्रभावकारी ढंगले अगाडि लैजान सकिने विश्वास गरिएको छ।

सहकारीले आर्थिक प्रगतिको उत्कृष्ट नमूना प्रस्तुत गर्दै गएको छ। आर्थिक वर्ष २०८०/८१ मा सहकारीले २ करोड ३१ लाख ५१ हजार ९४ रुपैयाँ नाफा कमाउन सफल भएको छ। यो नाफा अघिल्लो वर्षको तुलनामा उल्लेख्य रूपमा वृद्धि भएको हो। आर्थिक वर्ष २०७९/८० मा सहकारीको नाफा १ करोड २६ लाख ८९ हजार २४२ रुपैयाँ थियो।

सापकोटाका अनुसार, सहकारीले सदस्यहरूको हितका लागि विभिन्न कार्यक्रम सञ्चालन गर्दै आएको छ। मितव्ययीता र पारदर्शिता सहकारीको मुख्य आधार भएको भन्दै उनले आगामी दिनमा अझ धेरै सदस्यहरूलाई सेवामा समेट्ने योजना रहेको बताए।

शनिबार सम्पन्न साधारणसभामा इटहरी नगरपालिकाका मेयर हेमकर्ण पौडेल प्रमुख अतिथि थिए। उनले सहकारीहरूले आफ्ना सिद्धान्तअनुसार सञ्चालन गर्न सके आर्थिक प्रगति गर्नुका साथै शेयर सदस्यहरूलाई पनि दीर्घकालीन फाइदा दिन सक्ने धारणा व्यक्त गरे।

मेयर पौडेलले सहकारीले लघुवित्त, बचत, लगानी, तथा आयआर्जनका क्षेत्रमा सकारात्मक योगदान पुर्‍याउँदै आएको बताउँदै सदस्यहरूको जीवनस्तर उकास्न सहकारीको भूमिकालाई अझ सशक्त बनाउन सुझाव दिए।

नवनिर्वाचित अध्यक्ष चन्द्रकुमार गिरीले सहकारीको उद्देश्य र सदस्यहरूको हितका लागि काम गर्ने प्रतिबद्धता जनाएका छन्। उनले सहकारीलाई प्रविधिमैत्री र अझ पारदर्शी बनाउँदै सदस्यहरूको विश्वासलाई अझ बलियो बनाउने योजना अघि सारेका छन्।

साधारणसभा र उपनिर्वाचनले सहकारीको आन्तरिक एकता र प्रगतिको दिशामा महत्वपूर्ण भूमिका खेल्ने विश्वास व्यक्त गरिएको छ। अध्यक्ष गिरीको नेतृत्वमा सहकारीले अझ प्रभावकारी सेवा प्रवाह गर्ने अपेक्षा गरिएको छ।