_1692346234_1692579957_1696057934.jpg)
इटहरी / इटहरी–२ स्थित ऐतिहासिक मुक्तिनारायण मन्दिरमा श्रीवामन महापुराण सप्ताह ज्ञान महायज्ञको भव्य रूपमा सुरुआत भएको छ। मन्दिर संरक्षण, संवर्द्धन र विकासलाई प्राथमिकतामा राख्दै मन्दिर सेवा समिति, इटहरी–२ आँपगाछीको आयोजनामा यो महायज्ञ बिहीबारदेखि शुरू भएको हो। कार्यक्रम आगामी पौष ३ गतेसम्म जारी रहनेछ।
महायज्ञको पहिलो दिन कलश शोभा यात्रा र मण्डप पूजनका साथ कार्यक्रमको शुभारम्भ गरिएको थियो। कलश यात्रामा स्थानीय वासिन्दा, भक्तजन, भजन कीर्तन टोली, र इटहरी २ का विभिन्न संघसंस्थाका प्रतिनिधिहरू सहभागी भए। यस क्रममा, इटहरी उपमहानगरपालिकाका नगर प्रमुख हेमकर्ण पौडेल प्रमुख अतिथि रहनुभएको थियो। उहाँले धार्मिक स्थलहरूको संरक्षण र धार्मिक गतिविधिहरूले समाजलाई सकारात्मक दिशामा लैजान मद्दत गर्ने बताउनुभयो। साथै, मन्दिरलाई २ लाख रुपैयाँ आर्थिक सहयोग गर्ने घोषणा गर्नुभयो।
मुक्तिनारायण मन्दिर सेवा समितिका संयोजक दिनेश भट्टराईका अनुसार महायज्ञको उद्देश्य मन्दिरको संरक्षण र व्यवस्थापनका लागि अक्षयकोष स्थापना गर्नुका साथै धार्मिक चेतना फैलाउने हो।
महायज्ञको अवधिमा मन्दिरमा विभिन्न धार्मिक तथा सांस्कृतिक कार्यक्रमहरू हुनेछन्। प्रत्येक दिन बिहान र साँझ विशेष पूजा-अर्चना, झाँकी प्रदर्शन, आध्यात्मिक प्रवचन, आरती, र प्रसाद वितरण गरिनेछ। कथा वाचनका लागि श्रद्धेय व्यासाचार्य पण्डित डा. पराङ्कुश प्रप्रन्नाचार्यलाई आमन्त्रित गरिएको छ भने पाठ पारायण पण्डित श्री प्रणव कोइरालाले गर्नेछन्।
कार्यक्रम उद्घाटनमा इटहरी–२ का वडा अध्यक्ष माधव कोइराला, मन्दिर सेवा समितिका पदाधिकारीहरू, र स्थानीयवासीहरूको उल्लेखनीय सहभागिता रह्यो। विभिन्न भजन कीर्तन टोलीहरूले धार्मिक वातावरणलाई थप मनोरम बनाएका थिए।
मन्दिर सेवा समितिका अध्यक्ष युवराज खतिवडाले स्थानीयवासी, इष्टमित्र, र छरछिमेकलाई महायज्ञमा सहभागी भई मन्दिरको विकास र संरक्षणमा आवश्यक सहयोग गर्न आग्रह गर्नुभयो। उहाँले समुदायको सक्रिय सहभागिताले मात्र मन्दिरको दीर्घकालीन विकास सम्भव हुने बताउनुभयो।
मुक्तिनारायण मन्दिर इटहरीको एक प्रमुख धार्मिक स्थल हो। यस प्रकारका धार्मिक कार्यक्रमले स्थानीय सांस्कृतिक र धार्मिक सम्पदाको संरक्षण मात्र होइन, नयाँ पुस्तामा धार्मिक र सामाजिक मूल्यको संवर्धन गर्ने काम गर्छ।
मुक्तिनारायण मन्दिरमा भएको यो महायज्ञले धार्मिक एकता, सामाजिक सहयोग, र आस्थाको प्रवर्द्धन गर्ने विश्वास गरिएको छ। मन्दिर सेवा समितिले यस्तो पवित्र कार्यक्रममा सहभागी भई मन्दिरको दीर्घकालीन विकासमा योगदान गर्न सबैलाई हार्दिक अनुरोध गरेको छ।
महायज्ञ आगामी सात दिनसम्म सञ्चालन हुनेछ। यस अवधिमा सहभागी हुन इच्छुक सबै भक्तजनलाई मन्दिर सेवा समितिले स्वागत गरेको छ।
