इटहरी । इटहरीमा जङ्गली हात्तीको आतंक बढेको छ । हात्तीको बथान दैनिक जसो बस्तीमा पस्दा आतंक बढेको हो ।

जिल्लाको इटहरी २ शान्तिनगरस्थित बस्तीमा जङ्गली हात्तीको बथान आउन थालेपछि स्थानीयवासी रातभर जाग्राम बस्न थालेका छन् । इटहरी २० र इटहरी २ मा पर्ने बन क्षेत्र आसपास बस्ने स्थानीयबासीहरु त्रसित बनेको छन् ।

२७  वटा हात्तीहरू बस्ति तिर आएपछि इटहरी २ स्थित शान्तिनगर तिर आउन थालेपछि  स्थानीयले  जिउ ज्यानको सुरक्षा माग गरेका छन् ।  स्थानीय रोशन अधिकारीकाअनुसार भारतबाट आएका हात्ती बस्तीमा पसेपछि आफूहरू रातभर जाग्राम बसेको दुखेसो गरे । स्थानीय सरकार मूकदर्शक बन्दा आफूहरू अन्धकारमा रातभर जाग्राम बस्न बाध्य भएको उनको गुनासो छ ।

छावासहित दर्जन बढीको सङ्ख्यामा आएका हात्तीले चार दिन देखि मानव बस्तीमा पस्न थालेपछि स्थानीय भयभीत भएका उनको भनाई छ ।

‘वडा क्षेत्रभित्रका अधिकांश बत्तीहरू बल्दैनन्, बिजुलीको पोलमा तारमात्रै झुण्डिएका छन्,’ उनले भने, ‘हामीले वडा कार्यालय र प्रहरी प्रशासनमा जानकारी गराएका छौँ, दैनिक हात्ती मानव बस्तीमा आउँदा समस्या भएको छ ।’

इटहरी क्षेत्रमा अधिकांश ठाउँमा बिजुलीको पोलमा बत्ती नबल्ने हुँदा अन्धकार हुँदै आएको छ । शान्तिनगर सामुदायिक वन क्षेत्रमा पर्ने चारकोसे जङ्गलबाट हात्तीको बथान आउने गरेको छ । यस क्षेत्रमा पर्ने पानीपयादेखि पीपलचौकसम्म २० वटा बत्ती भएपनि कुनै बल्दैनन् । जसकारण बिहान कलेज, स्कुल जान विद्यार्थीहरूलाई पनि समस्या हुने गरेको छ । हात्ती मानव बस्तीमा पस्न नदिनका लागि प्रशासनसँग माग गरिएको छ ।