इटहरी | इटहरी उपमहानगरपालिकाले ३ अर्ब ५७ करोड ८४ लाख ५० हजारको बजेट सार्वजनिक गरेको छ । सोमबार दिउँसो १ बजे नगरसभा बोलाइएको र पछि ५ बजेलाई सारिएपनि रातिमात्रै नगरसभा बैठक बस्दै बजेट प्रस्तुत गरिएको हो ।

उपमेयर संगीता चौधरीले बजेट प्रस्तुत गर्नुपर्ने भएपनि नेकपा एमालेले इटहरीको नगरसभा बहिष्कार गरेको थियो । १ बजे बोलाएर ७ बजेसम्म बैठक सुरु नभएको र बजेटको आकार तथा सिलिङमा सहमति नभएपछि एमालेले बैठक बहिष्कार गरेको जनाएको छ ।

त्यससँगै इटहरी ६ वडाध्यक्ष दिवस पोखरेलले सोमबार रातको करिब १० बजे बजेट प्रस्तुत गरे । १०९ नगरसभा सदस्यमध्ये नगरप्रमुख पौडेलसहित २० जना सदस्यहरूको मात्रै उपस्थितिमा आयव्यय पेस गरिएको छ ।

एमालेले बहिस्कार गरेपछि प्रवक्तासमेत रहेका पोखरेललाई नगरसभा अध्यक्ष तथा मेयर हेमकर्ण पौडेलले जिम्मेवारी दिएका थिए ।

बजेट प्रस्तुत गर्ने जिम्मेवारी पाएका पोख्रेलले ३ अर्ब ५७ करोड ८४ लाख ५० हजारको बजेट प्रस्तुत गरेका छन् । पेस गरेको बजेटमा चालू तर्फ १ अर्ब ४१ करोड ३४ लाख ३७ हजार, पुँजीगततर्फ २ अर्ब १५ करोड ६० लाख रहेको छ ।

त्यस्तै, इटहरी उपमहानगरपालिकाले लिएको ऋणको ब्याजका लागि ९० लाख वित्तीय व्यवस्थातर्फ बजेट व्यवस्थापन गरेको छ । पोख्रेलले पेस गरेको बजेटमा पुँजीगत खर्चतर्फ वडागत सिलिङमा ३८ करोड बजेट र नगरस्तरका योजनामा ४५ करोड समेत समावेश गरिएको छ ।

प्रस्तुत बजेटमा इटहरी उपमहानगरले आव २०८१।०८२ को मुख्य ५ वटा प्राथमिकताहरू रहेका छन् । जसमध्ये भौतिक पूर्वाधार विकास ,स्वास्थ्य र शिक्षाको विकास, समाज परिचालन र समाजिक विकास, कृषि र उत्पादनमा जोड ,बाढी नियन्त्रण एवं विपद् जोखिम न्यूनीकरण रहेको छ ।

आगामी आर्थिक वर्षको लागि संघीय समानिकरण अनुदान २९ करोड ५६ लाख, संघीय ससर्त अनुदान चालुखर्च तर्फ ४९ करोड ४३ लाख १५ हजार, संघीय ससर्त अनुदान पुँजीगत खर्च तर्फ ८१ करोड ९३ लाख ११ हजार संघीय समपुरक अनुदान ४ करोड, संघीय विशेष अनुदान ५ करोड, प्रदेश समानिकरण अनुदान १ करोड ९४ लाख ४५ हजार, प्रदेश ससर्त अनुदान चालुखर्च तर्फ ३२ लाख ३८ हजार, प्रदेश ससर्त अनुदान पुजीगत खर्च तर्फ २ करोड ४४ लाख, प्रदेश समपुरक अनुदान १ करोड ७७ लाख, संघीय राजश्व बाँडफाँड १९ करोड ११ लाख, प्रदेश राजश्व वाँडफाँड (सवारी कर) २ करोड ३३ लाख ४१.हजार, प्रदेश राजश्व बाँडफाँड (मालपोत रजिष्ट्रेसन ) ५६ करोड, आन्तरिक श्रोतबाट ९६ करोड, र नगद मौज्दात परिवर्तनबाट ३ करोड र नगर विकास कोषबाट आन्तरिक ऋण ५ करोड गरि कुल जम्मा ३ अर्ब ५७ करोड ८४ लाख ५० हजारको अनुमानित बजेट पेस गरिएको हो ।

स्थानीय तहहरूले असार १० भित्र बजेट पालिका सभामा पेस गर्नुपर्ने कानुनी व्यवस्था छ ।

बजेटमा कुरा नमिलेपछि उनीहरुले नगरसभा बहिष्कार गरेर हिडेका हुन् । एमालेका जनप्रतिनिधि हिडेपनि मेयर हेमकर्ण पौडेल एक्लैले नगरसभा अघि बढाएका छन् ।

दिउँसो कार्यपालिका बैठक बसेको तर त्यसमा पनि गम्भीरतापुर्वक छलफल नभएको एमाले नगरसभा सदस्य प्रमोद शेर्पाले बताए । 

उनले राजस्व परामर्श समिति, योजना तर्जुमा समितिहरुको बैठकमा मेयर अनुपस्थित भएको, नगरसभाको अघिल्लो दिन कार्यपालिका बैठक बोलाएको, सिलिङसमेत नतोकेको र लापरवाहीपूर्ण बजेट प्रक्रिया अघि बढाएको आरोप लगाए ।

उपमहानगरको क्षमताअनुसारको तथ्यमा आधारित बजेट ल्याउनुपर्ने आफुहरुको अडान रहेको बताए । ‘यसअघि पनि हेर्दा राम्रो र ठूलो तर भित्र खोक्रो बजेट ल्याएकोले अहिले उपभोक्ता समितिहरुले दुःख पाएका छन्, कर्मचारीहरुले तलब पाएका छैनन्,’ उनले भने, ‘हामीले ३ अर्ब १० करोडको बजेट ल्याउने भन्यौं, वहाँ ४ अर्बको बजेट ल्याउन चाहने भएर कुरा मिलेन र हामी हिड्यौं ।’

एमाले जनप्रतिनिधिले छाडेपछि  नेपाली काँग्रेसका जनप्रतिनिधिहरुको उपस्थितीमा मेयर पौडेलले नगरसभा अघि बढाएका छन् भने प्रवक्ता दिवस पोख्रेलले बजेट प्रस्तुत गरेका छन् ।

इटहरीमा मेयर र नेकपा एमाले जनप्रतिनिधिहरुबिच वादविवादको श्रृंखला पहिलेदेखिकै भएपनि बहुमत सदस्यले नगरसभा बहिष्कार गरेको र मेयर एक्लैले नगरसभा अघि बढाएर बजेट प्रस्तुत गरेको यो पहिलो घटना हो ।