_1692346234_1692579957_1696057934.jpg)
इटहरी । समाजसेवी दम्पत्ती रामचन्द्र अधिकारी र सीता अधिकारीले दिवंगत आमाबुवाको स्मृतिमा स्थापना गरेका विभिन्न पुरस्कारहरु वितरण गरिएको छ । साहित्य तथा सञ्चार क्षेत्रमा योगदान दिने विभिन्न व्यक्तिहरुलाई पुरस्कार दिइएको हो ।
रामचन्द्र अधिकारी अध्यक्ष रहेको तारानीधि धनमाया अधिकारी स्मृति प्रतिष्ठानले पत्रकार, साहित्यकार तथा सामाजिक संस्थालाई नगदसहित सम्मान गरेको हो ।
सासु–ससुराको नाममा स्थापना गरेको दीननाथ-नारायणीदेवी पौडेल स्मृति पुरस्कार २०७८ बाट सुनसरीका अग्रज पत्रकार गिरिराज आचार्यलाई नगद रु. २५ हजार रुपैयासहित सम्मान गरिएको छ ।
यस्तै पत्रकार शिव गाउँलेलाई नगद ३५ हजार रुपैयासहितको नारायणप्रसाद रिजाल स्मृति पुरस्कार २०७८ बाट सम्मान गरिएको छ । रिजाललाई अधिकारीले कर्मपिता मानेका छन् ।
यस्तै पूर्वान्चल बालसेवा आश्रम विराटनगरलाई नगद २५ हजार रुपैया राशीको तारानिधि–धनमाया समाजसेवा पुरस्कार प्रदान गरिएको छ ।
यस्तै ५१ हजार रुपैया राशीको तारानिधि–धनमाया स्मृति पुरस्कार वरिष्ठ साहित्यकार सरुभक्तलाई दिइएको छ । कार्यक्रममा सरुभक्त उपस्थित हुन नसकेकोले केही दिनमा उनी इटहरी आएर पुरस्कार ग्रहण गर्ने आयोजक संस्थाले जानकारी दिएको छ ।
प्रतिष्ठानले एक करोड रुपैयाको अक्षयकोष नै स्थापना गरेर पुरस्कार वितरण गर्दै आएको छ । प्रत्येक वर्ष एक जना साहित्यकार, राष्ट्रिय स्तरमा योगदान पुर्याउने एक जना पत्रकार, सुनसरीका एक जना पत्रकार र एउटा सामाजिक संस्थालाई पुरस्कार दिँदै आएको छ ।
कार्यक्रममा बोल्दै प्रमुख अतिथि इटहरी उपमहानगरपालिकाका मेयर हेमकर्ण पौडेलले एक करोड राशीको अक्षयकोष भएको पुरस्कार प्रदेश १ मै निकै कम रहेको बताउँदै समाजलाई योगदान दिने संस्थाहरुको संरक्षणको दायित्व इटहरी उपमहानगरपालिकाले बहन गर्ने बताए । उनले रामचन्द्र अधिकारीले इटहरीको विकासमा दिएको योगदानहरुको पनि चर्चा गरेका थिए ।
८५ वर्षका अधिकारीले यसअघि पनि विभिन्न सामाजिक संघसंस्था, मन्दिर तथा सामाजिक अभियानहरुलाई सहयोग गरिसकेका छन् भने विभिन्न सामाजिक संघसंस्थामार्फत् सामाजिक योगदानसमेत दिइसकेका छन् ।
