इटहरी | पछिल्लो समय सहकारी संस्थाहरूप्रति विश्वास घट्दै गएको अवस्थामा, इटहरी–२० मा रहेको शान्ति जनकल्याण बहुउद्देश्यीय सहकारी संस्था लिमिटेडले बचतकर्ताको मन जित्दै उल्लेखनीय नाफा आर्जन गर्न सफल भएको छ। आर्थिक वर्ष २०८०/८१ मा उक्त सहकारीले २ करोड ३१ लाख ५१ हजार रुपैयाँ बढी नाफा कमाएको छ, जुन अघिल्लो वर्षको तुलनामा ८२.४५ प्रतिशत वृद्धि हो।

विगतका केही वर्षहरूमा सहकारी क्षेत्रमा देखा परेका अनियमितता र अपचलनका घटनाहरूले बचतकर्ताहरूमा त्रास उत्पन्न गरेको छ। तर, शान्ति जनकल्याण बहुउद्देश्यीय सहकारी संस्थाले भने पारदर्शी व्यवस्थापन, प्रविधिमैत्री सेवा र उद्यमशीलतालाई प्राथमिकता दिँदै बचतकर्ताको विश्वास जित्न सफल भएको छ।

संस्थाले अघिल्लो आर्थिक वर्ष २०७९/८० मा १ करोड २६ लाख ८९ हजार २४२ रुपैयाँ नाफा आर्जन गरेको थियो। तर, पछिल्लो आर्थिक वर्षमा यो नाफा १ करोड बढीले वृद्धि भई २ करोड ३१ लाख ५१ हजार रुपैयाँ पुगेको छ। नाफा वृद्धिको मुख्य कारण सहकारीले अपनाएको सुव्यवस्थित ऋण लगानी, प्रविधिमैत्री सेवा र उद्यमशीलता प्रवर्द्धन गर्ने नीति रहेको बताइएको छ।

संस्थाका अध्यक्ष चन्द्र गिरीका अनुसार, पछिल्लो समयमा आर्थिक तरलता समस्या भए पनि सहकारीले उच्च नाफा आर्जन गर्न सफल भएको छ। उनका अनुसार, संस्थाले डिजिटल बैंकिङ प्रणालीलाई अपनाउँदै आर्थिक कारोबारलाई अझ पारदर्शी र छरितो बनाउने प्रयास गरिरहेको छ। आगामी साधारणसभामा शेयर सदस्यहरूलाई ८ प्रतिशत लाभांश वितरण गर्ने योजना रहेको अध्यक्ष गिरीले जानकारी गराएका छन्।

सहकारीले नाफामात्रै कमाइरहेको छैन, यसले आफ्ना सदस्य तथा बचतकर्ताहरूलाई उद्यमशील बनाउन विभिन्न कार्यक्रमहरू सञ्चालन गर्दै आएको छ। संस्थाले आफ्नै भवनमार्फत सेवा प्रवाह गर्दै बचतकर्ताहरूलाई जुत्ता चप्पल तालिम, व्यवसायिक तालिम, तथा निश्चित शिविरहरू सञ्चालन गरिरहेको छ।

यसै क्रममा, संस्थाले आफ्नो वार्षिक साधारणसभामा असलबाल बचतकर्ता, असल बचतकर्ता सेयर सदस्य, असल ऋणी सदस्य, जेष्ठ नागरिक सदस्य तथा विद्यार्थीहरूलाई सम्मान गर्ने परम्परा कायम राख्दै आएको छ। सहकारीले आफ्ना सदस्यहरूलाई मात्र नभई, समाजका विभिन्न वर्गहरूलाई उद्यमशील बनाउन निरन्तर प्रयास गरिरहेको छ ।

हाल सहकारीको वित्तीय अवस्था मजबुत देखिन्छ। संस्थाका प्रमुख व्यवस्थापक मुकुन्द कार्कीका अनुसार शेयर पूँजी ८ करोड ३७ लाख ११ हजार ६०० रुपैयाँ, जगेडा कोष – ३ करोड ४४ लाख ५६ हजार २३८ रुपैयाँ,विभिन्न कोषहरू २ करोड ९१ लाख ४७ हजार ९ रुपैयाँ, ऋण लगानी  ४० करोड ५१ लाख ९८ हजार ९५३ रुपैयाँ रहेको छ।

संस्थाले अत्यधिक ब्याजदर लिने प्रवृत्तिविरुद्ध रहेर उचित ब्याजदर कायम गर्दै आफ्ना बचतकर्ताहरूलाई सुलभ दरमा ऋण प्रवाह गर्ने नीति अपनाएको छ। यसले व्यवसाय गर्न चाहने सदस्यहरूलाई ठूलो राहत दिएको छ।

शान्ति जनकल्याण बहुउद्देश्यीय सहकारी संस्थाको नेतृत्वमा पछिल्लो समय केही परिवर्तन आएको छ। २०७९ पुस २९ गते सम्पन्न निर्वाचनमा वीरबहादुर लिम्बू अध्यक्ष निर्वाचित भएका थिए। तर, दुर्भाग्यवश, गत चैत २८ गते उनको निधन भएपछि संस्थाले उपनिर्वाचनमार्फत चन्द्र गिरीलाई अध्यक्ष चयन गरेको हो।

नयाँ नेतृत्वले संस्थालाई डिजिटल प्रविधिमैत्री बनाउँदै बैंकिङ प्रणालीमार्फत सेवा प्रवाह गर्ने तयारी गरिरहेको छ। अध्यक्ष गिरीका अनुसार, डिजिटल बैंकिङ प्रणाली लागू भएपछी सदस्यहरूले अनलाइनबाटै बचत तथा ऋण कारोबार गर्न सक्नेछन्।

शान्ति जनकल्याण बहुउद्देश्यीय सहकारी संस्थाको स्थापना २०४९ साल फागुन ९ गते चन्द्रप्रसाद रेग्मीको घरमा परिकल्पना गरिएको थियो। सहकारीले सुरुवाती दिनमा प्रति सेयर ५० रुपैयाँका दरले जम्मा २,३०० रुपैयाँ संकलन गरी आफ्नो यात्रा सुरु गरेको थियो।

हालसम्म सहकारीमा २,१०० भन्दा बढी सेयर सदस्य रहेका छन्। सहकारीले आफ्नो औपचारिक दर्ता २०५२ साल फागुन ८ गते सहकारी प्रशिक्षण तथा डिभिजन कार्यालय, सुनसरीमा गराएको थियो । स्थापनाको तीन दशकभन्दा लामो इतिहास बोकेको यस सहकारीले समयानुकूल सेवा तथा सुविधा प्रदान गर्दै आफ्नो पहिचान बलियो बनाउँदै गएको छ ।

शान्ति जनकल्याण बहुउद्देश्यीय सहकारी संस्थाले बचतकर्ताको विश्वास जित्दै आर्थिक रूपमा उल्लेखनीय नाफा आर्जन गरेको छ। नाफाको वृद्धिसँगै, संस्थाले आफ्ना सदस्यहरूलाई विभिन्न उद्यमशील तालिम प्रदान गर्दै, उचित ब्याजदर कायम गर्दै, प्रविधिमैत्री सेवा ल्याउँदै सहकारीलाई अझ मजबुत बनाउँदै लगेको छ।

संस्थाका अध्यक्ष चन्द्र गिरीका अनुसार, आगामी दिनमा सहकारीलाई पूर्ण रूपमा डिजिटल बनाउने, सदस्यहरूलाई अझ बढी सुविधासम्पन्न सेवा प्रदान गर्ने, तथा बचतकर्ताको सुरक्षालाई अझ प्रभावकारी बनाउने योजनाहरू अघि सारिएको छ।

सहकारीको पारदर्शिता, राम्रो व्यवस्थापन, र नवीनतम प्रविधिको प्रयोगले यसलाई अन्य सहकारीहरूका लागि एक उत्कृष्ट उदाहरण बनाइदिएको छ। यदि सहकारीहरूले यस्तै नीतिहरू अवलम्बन गर्न सके, भविष्यमा नेपाली सहकारी क्षेत्र अझ सुरक्षित, पारदर्शी, र लाभदायक बन्न सक्ने देखिन्छ।