_1692346234_1692579957_1696057934.jpg)
भोजपुर | भोजपुरको टेम्केमैयुङ गाउँपालिकाको वडा नम्बर ९ मा डिजिटल साक्षरताको प्रवर्धन गर्न आयोजित कम्प्युटर तालिम पुस ०२ गतेबाट सुरु भएर माघ ०९ गतेसम्म सफलतापूर्वक सम्पन्न भएको छ। तालिममा वडाको बजेटबाट १,५०,००० रुपैयाँ खर्च गरिएको थियो, जसमा २५ जना प्रशिक्षार्थीले सहभागिता जनाएका थिए।
तालिमको आयोजनाको मुख्य उद्देश्य वडाका नागरिक, कर्मचारी, शिक्षकहरूलाई डिजिटल साक्षरता प्रदान गर्दै आधुनिक प्रविधिको प्रयोग गर्ने सीपमा दक्ष बनाउनु रहेको थियो। तालिमका लागि प्रशिक्षकका रूपमा न्यूक्लियस एकेडेमी भोजपुरका दिपेश राईले नेतृत्व गरेका थिए। तालिमको दौरान सहभागीहरूले कम्प्युटरको आधारभूत प्रयोगदेखि विभिन्न डिजिटल उपकरणको सञ्चालन, इन्टरनेटको उपयोग, तथा विभिन्न सफ्टवेयर प्रयोगबारे ज्ञान आर्जन गरेका थिए।
तालिमको दौरान उत्कृष्ट प्रदर्शन गर्ने ३ जना प्रशिक्षार्थीहरू—सेलीना राई, प्रमिला लुईटेल, र सरिता मगर—लाई न्यूक्लियस एकेडेमीले एडभान्स कोर्सको लागि छात्रवृत्ति प्रदान गरेको छ। छात्रवृत्तिको घोषणाले सहभागीहरूलाई थप प्रेरणा प्रदान गरेको वडाध्यक्ष नभराज माङ्गपाहाङ्गले बताए। उनका अनुसार, "यस प्रकारका कार्यक्रमले हाम्रो वडामा डिजिटल विकासको यात्रालाई गति दिन मद्दत गर्दछ। सहभागीहरूले यहाँ सिकेको ज्ञान र सीप वडाका अन्य मानिसहरूलाई पनि हस्तान्तरण गर्नुपर्छ।"
तालिममा वडाका नागरिक, कर्मचारी, शिक्षक लगायतका २५ जनाले उत्साहका साथ सहभागिता जनाएका थिए। सहभागीहरूले तालिमलाई ज्ञानमूलक र व्यावहारिक भएको बताउँदै आगामी दिनमा यस्ता कार्यक्रमलाई निरन्तरता दिनुपर्ने माग गरेका छन्।
तालिमको समापन समारोहमा वडाध्यक्ष नभराज माङ्गपाहाङ्ग, न्यूक्लियस एकेडेमीका प्रतिनिधिहरू, तथा स्थानीय समुदायका व्यक्तिहरूको उपस्थिति रहेको थियो। वडाध्यक्षले आगामी दिनमा पनि डिजिटल साक्षरताका क्षेत्रमा वडाले निरन्तर योगदान पुर्याउने प्रतिवद्धता व्यक्त गरे।
यो तालिमले वडाको डिजिटल क्षमता वृद्धिमा मात्र नभई समग्र स्थानीय विकासमा सकारात्मक प्रभाव पार्ने विश्वास आयोजकहरूले व्यक्त गरेका छन्।
